Sistema Patrulha

Sistema Patrulhas

B.P hanoin kona ba patrulla wainhira nia hala’o funu hasoru Matabele sira. Iha tempu neba B.P haki’ak grupu ho ema soldadu nain ne’en (6) deit. Nia Fo knar espesifiku ba soldadu ida-idak, atu ajuda sira dezenvolve sira nia kapasidade oioin. Se kada soldadu iha Patrulha mak la halo nia knar, Patrulha hotu sai a’at.

Patrullha hanesan familia ki’ik. Ema ida-idak la hanesan, tamba ema ida-idak iha ninia identidade rasik, maibe nundar familia, sira hotu la’o hamutuk iha unidade.

Patrulla mos hanesan sosiedade ki’ik: kada ema ida iha nia responsabilidade rasik. Se nia kumpri nia kna’ar, komunidade hotu manan, se nia la halo, komunidade hotu lakon. Tuir modelo uda ne’e B.P hakarak ajuda kada eskuteiro atu desenvolve an. Se eskuteiro sente moe, liu husi nia servisu iha patrulla laran, nia bele hadi’a nia-an. Se eskuteiro iha jeitu atu halo buat ida, nia bele aprende oinsa halo diak liu tan.

I.                     Knar Membro Patrulla ou Equipa nian

Iha patrulla ida-idak, kada eskuteiru iha servisu espesifiku, tuir nian funsaun. Funsaun sira mak hanesan:

1. GUIA/CHEFE Patrulla nian

Guia hanesan Kondutor Patrulla nian. Guia nia funsaun mak:

• Organiza Patrulla durante servisu patrulla nian, no guia sai responsavel ba Patrulla nia lala'ok hotu.
• Guia tenke fo ezemplu ba nia belun sira. Guia hatene halo buat ne'ebe nia haruaka.
• Treina Sub-Guia atu troka nia, no mos atu dezenvolve nia kapasidade hanesan Lider.
• Hamutuk ho Konsellu de Guia sira, prepara ba formasaun materia ba nia belun sira.
• Tau Matan ba nia belun sira hodi hatene tulun sira.
• Fahe responsabilidade ho nia belun sira: koalia hamutuk ho sira kona ba atividade sira fo korajen ba sira atu hato'o sira nia hanoin.
• Tuir Konsellu de Guia hanesan representante husi nia patrulla
• Nia fahe informasaun ba nia belun sira kona ba konsellu de Guia.

Guia nia Pefil mak hanesan tuir mai ne'e:

Guia nia dalan la'os atu sai ditator. Guia nia responsabilidade mak fo ezemplu kona ba eskutismu ba nia belun sira. Nia la'os polisia: nia la tenke vijia nia belun sira. Nia Tenki sai lider di'ak hodi fo atensaun ba kada eskuteiru; fo valor ba ema ida idak nia opiniaun; fo konfiansa ba sira; fo korajen ba sira; ajuda sira atu sai kreativu; ajuda sira atu hanoin klean liu kona ba situasaun oi-oin; ajuda sira atu dezenvolve an.

Oinsa sai Guia iha Eskuteiro?

• Primeiro: Chefe seksaun tenke esplika di'ak ba aspirante hotu saida mak Guia. Chefe tenke esplika kona ba Funsaun guia no kona ba nia Perfil.
• Segundu: Chefe bele prepara atividade oi-oin atu eskuteiro sira bele koñese malu di'ak liu: sira nia kapasidade, sira nia talentu sira.
• Terseiru: Hafoin esplika, chefe sei husu ba patrulla ida-idak atu hili nia Guia, tuir chefe sira nia esplikasaun. prosesu eleisaun tenke demokratiku.

Oinsa troka funsaun eskuteiru nian?

Objetivu funsaun sira nia mak fo oportunidade ba eskuteiru sira dezenvolve sira an. Kada funsaun ajuda sira atu dezenvolve kapasidade espesifiku. Tamba ne'e, importante tebes atu sira troka funsaun tuir tempu. Sira bele troka funsaun wainhira:

• Termina ona sira nia tempu (hanesan, kada tinan sira simu knar foun).
• Sira nia lalaok la dun diak, no presiza aprende buat seluk.
• Chefe mak deside presiza troka.

    2.  Sub-Guia

Depois de Guia Patrulla hili ona, Guia tenke hili ninia tulun nain, ho naran Sub-Guia. Sub-Guia nia responsabilidade mak:

• Se Guia laiha, Sub-Guia troka nia durante servisu; ajuda eskiuteiru sira, organiza enkontru.
• Fo formasaun, hamutuk ho Guia, ba nia belun sira.
• Partisipa iha Konsellu de Guia, hamutuk ho Guia.

    3.  Sekretariu

• Durante enkotru, sekretariu hakerek apontamentu sira no halo akta iha Patrulla nia Diariu.
• Hakerek relaotoriu kona ba atividades sira.
• Prepara arkivu/pasta ho informasaun sira kona ba membru patrulla nian (Naran, familia, hela fatin no nst).
• Prepara relatorio ba chefe sira kona ba Patrulla.

Guia tenke le'e sekretariu nia textu.

   4.  Tesoureiro

• Responsavel ba Patrulla nia osan.
• Buka maneira diak atu patrulla hetan osan hodi prepara material no halo atividades
• Halo rejistu kona ba patrulla nia osan.
• Tenke hatudu Patrulla nia rejistu kona ba osan ba Chefe sira no mos ba Patrulla.

   5.  Bibliotekário/arquivu

• Had'ia Patrulla nia fatin, no mos ajuda nia belun sira atu hamos fatin ne'e.
• Prepara biblioteka báziku patrulla nian hamutuk ho tesoureiro.
• Guarda jornal, revista, fotografia no testu oi-oin katak patrulla bele gosta.

  6.  Guarda-material ou Logistica

• Tau matan no rau patrulla nia material sira (Kanuru, katana, tali no nst).
• Prepara rejistu kona ba patrulla nia material sira.
• Hare'e se patrulla presiza materia ruma karik, no hateten ba patrulla.
• Durante akampamentu, tau matan ba material sira atu labele estraga.
• Organiza prepara tenda ou fatin ba acampa patrulla nian wainhira iha akampamentu.

  7.  Cozinheiro/a (Tein nain)

• Prepara material, hamutuk ho Guarda material atu ba tein.
• Prepara livru menu ba hahan patrulla nia durante akampamentu
• Hanorin eskuteiro sira atu tein
• Durante Akampamentu, organiza dapus no fahe servisu ba malu.

  8.  Animador

• Prepara textu ou livru animasaun nian.
• organiza animasaun husi patrulla nian
• Hanorin musika no teatru no animasaun ruma ba malu
• Durante Fogo de Conselho, nia bele sai "Animador"